TIPOLOGJI TË NJË QYTETI KUFITAR: DURRËSI GJATË DY SHEKUJVE TË PARË TË SUNDIMIT OSMAN (SHEK. XVI-XVII)

Abstrakti

Periudha osmane zë një vend të rëndësishëm në historinë e
Shqipërisë. Kjo, jo vetëm për harkun shekullor prej pesë shekujsh të
pranisë së osmanëve në këtë hapësirë por më së shumti edhe për faktin se
dokumentacioni arkivor i kësaj periudhe na jep të dhëna shumë të
rëndësishme për historinë e shqiptarëve. Ky element ka qenë edhe njëri
prej shkaqeve që periudha osmane të jetë vazhdimisht në fokusin e
historianëve shqiptarë dhe të huaj. Për rrjedhojë, lexuesi i thjeshtë dhe ai i
kualifikuar tashmë ka në dorë një korpus të konsiderueshëm me studime
mbi periudhën osmane të Shqipërisë.