PAKICA MALAZEZE, ROMËT DHE HEBRENJTË GJATË VITEVE 1925-1939

Abstrakti

Në vitet e para të regjimit të A. Zogut u ruajt influenca e Jugosllavisë në popullsinë ortodokse të Shkodrës. Vijonin të funksiononin dy shkolla private serbe që sponsorizoheshin në mënyrë të fshehtë nga qeveria jugosllave. Njëra prej tyre ishte në Shkodër. Megjithëse ortodoksët e Shkodrës ishin shqiptarë nga raca, gjuha dhe zakonet, disa prej tyre i dërgonin fëmijët në këtë shkollë, e cila punonte intensivisht që të përhapte gjuhën serbe tek ortodoksët shqiptarë të Shkodrës për t’u ndryshuar kombësinë e tyre. Për më tepër, kjo shkollë nuk kishte plotësuar formalitetet e duhura ligjore për funksionimin e saj. Prandaj, në prill të vitit 1926, prefektura e Shkodrës propozoi mbylljen e saj.