POLITIKA E SHTETIT KOMUNIST SHQIPTAR NDAJ KOMUNITETIT ORTODOKS: RASTI I MINORITETIT GREK (1945-1950)

Abstrakti

Lëvizjet populiste antifetare të vitit 1967, të cilat u finalizuan me dekretin e nëntorit të po atij viti1, si dhe ligjësimi i procesit nga Kushtetuta e RPSSH (28 dhjetor 1976) ishin dy aktet e fundit të një drame që fillesat e saj i kishte që me ngritjen e komunistëve në pushtet. Drejtuesit e lartë të PKSH-së perceptonin dy rivalë të ideologjisë marksiste-leniniste në shoqërinë shqiptare: nacionalizmin tradicional dhe besimet fetare. Por, ndërsa nacionalizmin ia nënshtruan qëllimeve të tyre unifikuese, duke e modifikuar dhe duke i dhënë një fytyrë të re, me besimet fetare as mundnin dhe as dëshironin të ndanin pushtetin.