MINORITETI GREK NË SHQIPËRI NË KONIUNKTURAT POLITIKE TË VITEVE 1939-1941

Abstrakti

Lufta e Dytë Botërore solli ndryshime në statusin e minoriteteve. Sistemi i mbrojtjes juridike i krijuar nga Lidhja e Kombeve, de facto pushoi së ekzistuari së bashku me këtë organizatë. Fillimi i Luftës së Dytë Botërore prishi status quo-në politike të vendosur nga Traktati i Versajës i vitit 1919. Shtetet ballkanike, të cilat kishin mbetur të pakënaqura nga përcaktimi i kufijve në përfundim të Luftës së Parë Botërore, e konsideruan fillimin e Luftës së re edhe si një si mundësi për të ndrequr “padrejtësitë” territoriale dhe etnike. Kjo i dha Luftës së Dytë Botërore në Ballkan, një karakter të shumëfishtë, që studiuesi Bernard Lory e ka përcaktuar si katër konflikte brenda një lufte1.