Edmond Malaj: "Drishti. Historia dhe fizionomia e një qyteti mesjetar shqiptar", Kristalina-KH, Tiranë 2015, f. 452

Abstrakti

Literaturës historiografike, respektivisht medievistikës, iu shtua edhe një
studim i cili përmbush një boshllëk të konsiderueshëm. Kjo pasi studimi i
qytetit mesjetar shqiptar është një tematikë pak e lëvruar.
Punimi monografik i prof. asoc. Edmond Malajt mbi historinë mesjetare të
Drishtit përmbush një nevojë për historiografinë shqiptare. Përmasat e këtij
vëllimi monografik i përshtaten më së miri historisë së pasur të këtij qyteti të
rëndësishëm të Shqipërisë mesjetare. Për shkak edhe të pasurisë dokumentare,
monografia është mjaft e pasur. Është padyshim meritë e autorit, që burimet e
disponueshme i ka hulumtuar me hollësi dhe njëkohësisht i ka analizuar me
rigorozitetin e duhur shkencor.