BASHKËPUNIMI SHQIPTARO-GREK DHE KURSI POLITIK I “MEGALI IDESË” 1877-1878

Abstrakti

Shpërthimi i luftës ruso-osmane, në fund të prillit të viti 1877, vuri në lëvizje të gjithë popujt e shtypur të Perandorisë Osmane dhe monarkitë ballkanike. Si një luftë kundër Perandorisë Osmane, ajo krijonte premisa, për bashkimin e popujve të Ballkanit në një front të përbashkët kundër saj. Qëndrimet e ndryshme që Fuqitë e Mëdha mbajtën ndaj luftës, kushtëzuan jetësimin e një projekti të tillë. Kështu, politika antiosmane e Mbretërisë Ruse, që nxitej nga synimet e saj drejt Egjeut, nuk u përkrah nga politika e Fuqive të Evropës Perëndimore, të cilat ishin për ruajtjen e gjendjes ekzistuese, duke mbështetur ekzistencën e Perandorisë Osmane. Një situatë të tillë solli edhe pozicionime të ndryshme të popujve dhe shteteve ballkanike. Shtetet dhe popujt sllavë, si pjesë e frontit pansllav, mbështetën Mbretërinë Ruse. Përjashtim bënin shqiptarët dhe grekët.