GREQIA MIDIS QEVERISË SË VLORËS DHE PLEQËSISË SË SHQIPËRISË SË MESME

Abstrakti

Nuk është hera e parë që për Qeverinë e Vlorës dhe Pleqësinë e Shqipërisë së Mesme, shkruhet në literaturën historike si shqiptare ashtu edhe të huaj. Punimet e deritashme në përgjithësi nuk kanë pasur si objektiv parësor të tyre, marrëdhëniet e dy autoriteteve qeverisëse me Greqinë. Një punë më e plotë është bërë kryesisht me qeverinë e Vlorës, ndërkohë që për Pleqësinë zbrazëtia është më e madhe. Shkrimi i mëposhtëm nuk merr përsipër të shterojë gjithçka. Ai synon nga njëra anë të plotësojë marrëdhëniet e Qeverisë së Vlorës dhe Pleqësisë së Shqipërisë së Mesme me Greqinë, nga ana tjetër të evidentojë “luhatjet” e politikës greke sa nga njëri autoritet tek tjetri, me qëllimin e vetëm, vënien në jetë të Megali Idesë.