1968-1969 - SHKRIRJA E AKUJVE NË BASHKËPUNIMIN KULTUROR SHQIPËRI-KOSOVË

Abstrakti

Para disa muajsh, duke hulumtuar në Arkivin e Ministrisë së Punëve të Jashtme, rastësisht më ra në dorë një Raport i përgatitur nga një grup profesorësh të Universitetit Shtetëror të Tiranës, mbi vizitën e tyre në Prishtinë, në maj 1968. Duke lexuar dokumentin, e gjeta mjaft interesante përmbajtjen e tij, ku raportet Shqipëri-Kosovë trajtohen në disa plane: shkencor, arsimor, kulturor, ekonomik, kombëtar dhe politik. I parë nga një largësi kohore prej 48 vitesh, kur Kosova është shpallur republikë dhe Shqipëria është bërë një vend demokratik, e vlerësova si punë të lavdërueshme deklasifikimin e këtij dokumenti, dhe mendova se do të ishte e dobishme ta bëj atë të njohur për publikun shkencor dhe më gjerë.