KONGRESI ARSIMOR I VITIT 1920 DHE RËNDËSIA E TIJ NË PËRCAKTIMIN E FIZIONOMISË KOMBËTARE TË ARSIMIT NË SHQIPËRINË E VITEVE 1920-1922

Abstrakti

Shteti shqiptar, qoftë qeveria e Vlorës, qeveria e Durrësit, principata e Princ Vidit apo qeveritë e tjera të krijuara deri në vitin 1919, nuk ishin në gjendje t’i realizonin aspiratat dhe shpresat e popullit shqiptar, duke përfshirë edhe ato në fushën e arsimit. Mbarimi i Luftës së Parë Botërore shtroi problemin e ekzistencës së shtetit shqiptar dhe të tërësisë tokësore të Shqipërisë së vitit 1913. Më 1919 gjendja e brendshme në Shqipëri ishte shumë e rëndë. Shkodra ishte nën administrimin ushtarak të Francës, Anglisë dhe Italisë; në Korçë ishin trupat ushtarake jugosllave, ndërsa pjesa më e madhe e vendit gjendej nën administrimin ushtarak italian.