DILEMA BRITANIKE PËR KOSOVËN: BRENDA APO JASHTË SHTETIT SHQIPTAR (1941-1945)

Abstrakti

Në Luftën e Dytë Botërore, krahas fuqisë njerëzore të BS dhe armatimeve luftarake të SHBA, diplomacia britanike spikati në krijimin e aleancave kundër Boshtit Nazifashist dhe në koordinimin e planeve të luftës. Winston Churchill (më tej: Uinston Çërçill) u bë promotori i Kartës së Atlantikut, gusht 1941, e më vonë i Aleancës së madhe Antifashiste, të cilën në janar të vitit 1942, presidenti amerikan Franklin D. Roosevelt (më tej: Franklin Ruzvelt), e pagëzoi me emrin “Kombet e Bashkuar”. Kauza e Aleatëve ishte lufta e përbashkët e shteteve, kombeve dhe individëve antifashistë deri në fitoren përfundimtare mbi Boshtin Nazifashist.